Тэлеканал АНТ прапануе маладафронтаўцам перайменаваць кампанію "Сыходзь!" у кампанію "Сыходзь, праціўны!".

Увечары 22 верасьня ў прамтай па тэлеканалу АНТ у аўтарскай праграме Аляксея Міхальчанка "Як есьць" быў паказаны рэклямны ролік пра дзейнасьць Маладога Фронту, грамадзкай кампаніі "Сыходзь!" і абароне касьцёла сьвятога Язэпа.

Рупар беларускай прапаганды сьцьвярджаў, што маладафронтаўцы дамагаюцца вяртаньне касьцёла вернікам, бо чакаюць палітычных дэвідэнтаў і нават дэвідэнтаў фінансавых ад зямлі ў цэнтры горада, на якой разьмешчаны будынак касьцёла сьвятога Язэпа. Тэлеканал зьвярнуўся таксама да ініцыятывы Маладога Фронту аб "байкоце" гэтак званых выбараў і мабілізацыі грамадзтва на плошчу 19 сьнежня 2010 году.

"Грошаў няма — ідзем на плошчу. Сьмелыя хлопцы, гэтыя маладафронтаўцы," — зазначае напачатку тэлепраграмы вядучы АНТ Аляксей Міхальчанка. Аўтар прызнае няўрымсьлівасьць маладафронтаўцаў і называе іх самымі "безбашеннымі" ўдзельнікамі прадвыбарчага працэсу.

Па тэлеэкрану ўслых і тэкстава працытавалі вытрымкі з рэзалюцыі МФ аб закліку людзей на Плошчу 19 сьнежня 2010 года.

Журналісты АНТ ня толькі надалі шмат увагі рэзалюцыі апошняга Сойму МФ пад назваю "Сыходзь!" і аднайменнай кампаніі, але й прапанавалі маладафронтаўцам перайменаваць кампанію ў "Сыходзь, праціўны!" Невядома, праўда, ці разгледжана дадзеная назва самім Праціўным або гэта самастойная ініцыятыва журналіста АНТ.

Відавочна, дадзены рэклямны ролік Маладога Фронта й кампаніі па недапушчэньні ўдзелу Лукашэнкі ў выбарах "Сыходзь!" ды арганізацыі "плошчы" сьведчыць аб тым, што беларуская прапаганда ў пэўнай разгубленасьці й ня ведае, як рэагаваць на пратэстныя настроі, што фармуюцца ў грамадзтве.

"Кожны апэлюе той лексыкалёгіяй, якая яму бліжэй, — камэнтуе прапанову канала АНТ аб перайменаваньні кампаніі "Сыходзь!" старшыня Маладога Фронту Зьміцер Дашкевіч — Мы ж да Лукашэнкі зьвяртаемся не ад імя прыватнай асобы, а ад імя грамадзтва: "Лукашэнка, сыходзь!" Сыходзь, спакойна й мірна, не ствараючы грамадзкай канфрантацыі, не прымушаючы беларускі народ выцягваць цябе й тваю хеўру з рэзыдэнцыі. Часу для прыняцьця гэтага рашэньня засталося ў цябе ня так і шмат".

Праглядзець шэдэўральны кінаролік можна на сайце тэлеканала АНТ:
http://ont.by/news/our_news/0061325